ఎండుతున్న పంటలు.. అప్పుల ఊబిలో రైతులు!
తెలంగాణ రైతు రక్షణ సమితి డిమాండ్‌
పరకాల తెలంగాణ గళం,అక్టోబర్ 27
ఎల్‌నినో ప్రభావంతో వర్షాభావ పరిస్థితులు నెలకొని పంటలు ఎండిపోతున్న నేపథ్యంలో వరంగల్‌ జిల్లాను కరువు ప్రభావిత జిల్లాగా ప్రకటించి రైతులను ఆదుకోవాలని తెలంగాణ రైతు రక్షణ సమితి నాయకులు డిమాండ్‌ చేశారు. పంట నష్టపోయిన రైతులకు తక్షణమే పరిహారం అందించడంతోపాటు అర్హులైన రైతులకు పంట రుణమాఫీ అమలు చేయాలని కోరుతూ జిల్లా కలెక్టర్‌కు వినతిపత్రం సమర్పించారు.
వర్షాలు ఆశించిన స్థాయిలో కురవకపోవడంతో భూగర్భ జలాలు అడుగంటుతున్నాయని, వ్యవసాయ బావులు, బోర్లలో నీటిమట్టాలు తగ్గిపోయి పంటలకు నీరందని దుస్థితి నెలకొందని నాయకులు వినతిపత్రంలో పేర్కొన్నారు. పెట్టుబడుల కోసం అప్పులు చేసి పంటలు సాగు చేసిన రైతులు నీటి కొరత కారణంగా పంటలు ఎండిపోవడంతో తీవ్రంగా నష్టపోతున్నారని ఆవేదన వ్యక్తం చేశారు. విత్తనాలు, ఎరువులు, పురుగుమందులు, కూలీల ఖర్చులు పెరగడం, మరోవైపు దిగుబడులు తగ్గిపోవడంతో రైతులు ఆర్థికంగా తీవ్ర ఇబ్బందులు ఎదుర్కొంటున్నారని తెలిపారు.
క్షేత్రస్థాయిలో పంట నష్టాలపై సర్వే చేపట్టాలి
జిల్లాలో నెలకొన్న వర్షాభావ పరిస్థితులను సంబంధిత అధికారులు క్షేత్రస్థాయిలో పరిశీలించి, నిబంధనల ప్రకారం కరువు ప్రభావిత ప్రాంతాలను గుర్తించాలని తెలంగాణ రైతు రక్షణ సమితి నాయకులు కోరారు.
వ్యవసాయ శాఖ ఆధ్వర్యంలో పంట నష్టాలపై సమగ్ర సర్వే నిర్వహించి, నష్టపోయిన రైతులకు తగిన పరిహారం అందించాలని విజ్ఞప్తి చేశారు. అర్హులైన రైతులకు పంట రుణమాఫీ అమలు చేయడంతోపాటు వ్యవసాయ రుణాల వసూళ్ల విషయంలో ఉపశమనం కల్పించేలా చర్యలు తీసుకోవాలని కోరారు.
సాగునీటి కొరత ఉన్న ప్రాంతాల్లో ప్రత్యామ్నాయ నీటి వనరులను గుర్తించి పంటలను కాపాడేందుకు అవసరమైన చర్యలు చేపట్టాలని, పంటల బీమాకు అర్హులైన రైతులకు పరిహారం అందేలా చూడాలని విజ్ఞప్తి చేశారు. రైతుల కష్టాలను దృష్టిలో ఉంచుకుని ప్రభుత్వం తక్షణమే స్పందించి, నష్టపోయిన రైతులకు న్యాయం చేయాలని డిమాండ్‌ చేశారు.
ఈ కార్యక్రమంలో తెలంగాణ రైతు రక్షణ సమితి హనుమకొండ జిల్లా అధ్యక్షుడు హింగె భాస్కర్‌, ఉమ్మడి వరంగల్‌ జిల్లా అధ్యక్షుడు వరికెల కిషన్‌రావు పాల్గొని రైతుల సమస్యలను అధికారుల దృష్టికి తీసుకెళ్లారు.
