పరకాల డివిజన్ పోలీసుల ఆధ్వర్యంలో రక్తదాన శిబిరం!

పోలీసు అమరవీరుల త్యాగాలకు ఘన నివాళి.. 

రక్తదానం ప్రాణదానంతో సమానం.. ఆపదలో ఉన్నవారికి రక్తం అందించి ప్రాణాలు కాపాడాలి

రక్తదానం ఆవశ్యకతను వివరించిన దామెర ఎస్సై వీరభద్రరావు

పరకాల, తెలంగాణ గళం అక్టోబర్ 22 

పోలీసు అమరవీరుల సంస్మరణ దినోత్సవాన్ని పురస్కరించుకుని పరకాల డివిజన్ పోలీసుల ఆధ్వర్యంలో సామాజిక సేవలో భాగంగా రక్తదాన శిబిరాన్ని నిర్వహించారు. 

విధి నిర్వహణలో ప్రజల ప్రాణరక్షణ కోసం తమ ప్రాణాలను సైతం త్యాగం చేసిన పోలీసు అమరవీరులకు ఘన నివాళులర్పిస్తూ, వారి సేవలను స్మరించుకునే ఉద్దేశంతో ఈ కార్యక్రమాన్ని చేపట్టారు.

ఈ సందర్భంగా పాల్గొన్న దామెర ఎస్సై వీరభద్రరావు రక్తదాన ఆవశ్యకత గురించి వివరించారు. రక్తదానం అనేది ప్రాణదానంతో సమానమని, ప్రమాదాల్లో గాయపడినవారికి, అత్యవసర వైద్య చికిత్స పొందుతున్నవారికి, శస్త్రచికిత్సలు అవసరమైన రోగులకు సకాలంలో రక్తం అందించడం ఎంతో కీలకమని తెలిపారు. 

రక్తం కృత్రిమంగా తయారు చేయలేమని, ఆరోగ్యవంతులైన వ్యక్తులు స్వచ్ఛందంగా రక్తదానం చేయడం ద్వారా ఎంతోమంది ప్రాణాలను కాపాడవచ్చని పేర్కొన్నారు.

ప్రతి ఒక్కరూ రక్తదానంపై ఉన్న అపోహలను వీడి, మానవతా దృక్పథంతో ముందుకు రావాలని పిలుపునిచ్చారు. రక్తదానం చేయడం వల్ల ఆపదలో ఉన్నవారికి ప్రాణదానం చేసినట్లేనని, యువతతో పాటు అర్హులైన ప్రతి ఒక్కరూ స్వచ్ఛంద రక్తదాన కార్యక్రమాల్లో పాల్గొని సామాజిక బాధ్యతను చాటాలని సూచించారు.

పోలీసు అమరవీరుల త్యాగాలను స్మరించుకోవడంతో పాటు, వారి సేవా స్ఫూర్తిని కొనసాగిస్తూ ప్రజలకు ఉపయోగపడే సామాజిక కార్యక్రమాలు నిర్వహించడం అభినందనీయమని ఈ సందర్భంగా పేర్కొన్నారు.