రూ.200 కోట్లతో శ్రీ సత్యనారాయణ స్వామి ఆలయ సమగ్రాభివృద్ధి
ఇప్పటికే రూ.70 కోట్ల నిధులు మంజూరు
వచ్చే ఏడాది గోదావరి పుష్కరాల నాటికి సర్వం సిద్ధం
సీఎం రేవంత్ రెడ్డి, డిప్యూటీ సీఎం భట్టి విక్రమార్కలకు కృతజ్ఞతలు
రాష్ట్ర ప్రజలకు విజయదశమి పండుగ శుభాకాంక్షలు తెలిపిన ఎమ్మెల్యే
ఆలయ పునర్నిర్మాణ పనులకు కుటుంబ సమేతంగా భూమిపూజ
దండేపల్లి (గూడెం):
దండేపల్లి మండలంలోని ప్రముఖ పుణ్యక్షేత్రమైన గూడెం శ్రీ సత్యనారాయణ స్వామి ఆలయాన్ని దేశంలోనే ప్రముఖ ఆధ్యాత్మిక క్షేత్రంగా, మరో 'అన్నవరం'గా తీర్చిదిద్దుతామని మంచిర్యాల శాసనసభ్యులు శ్రీ కొక్కిరాల ప్రేమ్ సాగర్ రావు స్పష్టం చేశారు. విజయదశమి పండుగను పురస్కరించుకుని ఆయన కుటుంబ సమేతంగా గూడెం చేరుకుని ఆలయ పునర్నిర్మాణ పనులకు శాస్త్రోక్తంగా భూమిపూజ చేసి, పనులను లాంఛనంగా ప్రారంభించారు. ఈ పర్వదినం సందర్భంగా తెలంగాణ రాష్ట్ర ప్రజలందరికీ ఆయన విజయదశమి పండుగ శుభాకాంక్షలు తెలియజేశారు.
ఈ సందర్భంగా ఏర్పాటు చేసిన కార్యక్రమంలో ఎమ్మెల్యే ప్రేమ్ సాగర్ రావు మాట్లాడుతూ.. గూడెం సత్యనారాయణ స్వామి ఆలయ అభివృద్ధికి సుమారు రూ.200 కోట్లు వెచ్చించనున్నట్లు తెలిపారు. ఇందులో భాగంగా ఇప్పటికే మొదటి విడత కింద రూ.70 కోట్ల నిధులు మంజూరయ్యాయని ఆయన వెల్లడించారు. వచ్చే ఏడాది అంగరంగ వైభవంగా జరగనున్న గోదావరి పుష్కరాల నాటికి పనులు వేగవంతం చేసి, రాష్ట్ర నలుమూలల నుంచి వచ్చే భక్తులకు ఎలాంటి ఇబ్బందులు కలగకుండా అన్ని రకాల వసతులు, ఏర్పాట్లు చేపడుతున్నామని వివరించారు. నిర్మాణ పనుల్లో ఎక్కడా ఎలాంటి నిర్లక్ష్యానికి తావులేకుండా నాణ్యతా ప్రమాణాలు పాటిస్తూ, ఆలయాన్ని సర్వాంగ సుందరంగా తీర్చిదిద్ది గూడెం క్షేత్రానికి జాతీయ స్థాయిలో మరింత గుర్తింపు తీసుకొస్తామని ఆయన పేర్కొన్నారు.
అడగగానే గూడెం ఆలయ పునర్నిర్మాణానికి నిధులు మంజూరు చేసిన రాష్ట్ర ముఖ్యమంత్రి శ్రీ ఎనుముల రేవంత్ రెడ్డికి, ఉపముఖ్యమంత్రి శ్రీ మల్లు భట్టి విక్రమార్కకు ఎమ్మెల్యే ప్రత్యేకంగా హృదయపూర్వక ధన్యవాదాలు తెలియజేశారు.
ఈ కార్యక్రమంలో మంచిర్యాల జిల్లా మాజీ డీసీసీ అధ్యక్షురాలు శ్రీమతి కొక్కిరాల సురేఖమ్మ, ఎమ్మెల్యే గారి తనయుడు కొక్కిరాల చరణ్ రావు, డీసీపీ భాస్కర్, ఈవో శ్రీనివాస్, ఆలయ అర్చకులు, మంచిర్యాల మున్సిపల్ కార్పొరేషన్ మేయర్ ధర్ని మధుకర్, సంబంధిత అధికారులతో పాటు మార్కెట్ కమిటీ చైర్మన్లు అక్కల వెంకటేశ్వర్లు, రామగిరి బానేష్, సింగిల్ విండో చైర్మన్లు నాగభూషణం, ముత్యాల శ్రీనివాస్, మంచిర్యాల చాంబర్ ఆఫ్ కామర్స్ చైర్మన్ గుండ సుధాకర్, మంచిర్యాల జిల్లా ఆర్జీపీఆర్ఎస్ అధ్యక్షులు గడ్డం త్రిమూర్తి, గూడెం సత్యనారాయణ స్వామి ఆలయ కమిటీ సభ్యులు, కార్పొరేటర్లు, కౌన్సిలర్లు, సర్పంచులు, మార్కెట్ కమిటీ డైరెక్టర్లు, సింగిల్ విండో డైరెక్టర్లు, ఉప సర్పంచులు, వార్డు మెంబర్లు, కాంగ్రెస్ నాయకులు, మహిళా నాయకురాళ్లు, యువజన కాంగ్రెస్ నాయకులు, కార్యకర్తలు తదితరులు పెద్ద సంఖ్యలో పాల్గొన్నారు
