హనుమకొండ నగరంలో తీవ్ర విషాదం చోటుచేసుకుంది. అదాలత్ కూడలిలో దశాబ్దాలుగా ఎంతో పేరుగాంచిన హోటల్ యజమాని, ప్రముఖ వ్యాపారవేత్త లింగాల కేదారి బుధవారం జరిగిన ఘోర అగ్ని ప్రమాదంలో దుర్మరణం పాలయ్యారు. ఈ ప్రమాదంలో ఆయన సజీవదహనం కాగా, ఆయన భార్యకు తీవ్ర గాయాలయ్యాయి.
స్థానికులు మరియు పోలీసులు తెలిపిన వివరాల ప్రకారం. హనుమకొండ అదాలత్ కూడలి సమీపంలోని వారి నివాసంలో/హోటల్‌లో ఒక్కసారిగా మంటలు చెలరేగాయి. క్షణాల్లోనే మంటలు ఇల్లంతా వ్యాపించడంతో లింగాల కేదారి అక్కడికక్కడే ప్రాణాలు కోల్పోయారు. ఈ ప్రమాదంలో ఆయన భార్యకు 80 శాతానికి పైగా తీవ్ర గాయాలయ్యాయి. గమనించిన స్థానికులు వెంటనే స్పందించి 108 అత్యవసర వాహనానికి సమాచారం అందించారు. తీవ్ర పరిస్థితిలో ఉన్న ఆమెను చికిత్స నిమిత్తం వరంగల్ ఎంజీఎం ఆసుపత్రికి తరలించారు. ప్రస్తుతం ఆమె పరిస్థితి విషమంగా ఉన్నట్లు సమాచారం.
లింగాల కేదారి మృతి పట్ల వరంగల్ ప్రజలు, ఉద్యమకారులు తీవ్ర దిగ్భ్రాంతి వ్యక్తం చేస్తున్నారు. ప్రత్యేక తెలంగాణ ఉద్యమ సమయంలో వేలాది మంది ఉద్యమకారులకు, సామాన్య ప్రజలకు ఎంతో తక్కువ ధరకే నాణ్యమైన భోజనాన్ని అందించి ఆయన మంచి పేరు సంపాదించుకున్నారు. ఉద్యమకారుల ఆకలి తీర్చిన మంచితనంగల వ్యక్తిగా కేదారికి నగరంలో ప్రత్యేక గుర్తింపు ఉంది.
కాగా, ఈ ప్రమాదానికి గల ఖచ్చితమైన కారణాలు ఇంకా తెలియరాలేదు. షార్ట్ సర్క్యూట్ వల్లనా లేక గ్యాస్ లీకేజీ కారణమా అనే కోణంలో పోలీసులు కేసు నమోదు చేసుకుని దర్యాప్తు చేస్తున్నారు.
