ఎంజీఎంలో మరోసారి భయం భయం!
తెలంగాణా గళం / హనుమకొండ (సెప్టెంబర్ 22):
• ఆర్‌ఐసీయూ, ఫిజియోథెరపీ విభాగాల్లో ఊడిన పైకప్పు పెచ్చులు
• ప్రమాదం తప్పడంతో ఊపిరి పీల్చుకున్న రోగులు, బంధువులు
• భవన భద్రతపై తీవ్ర ఆందోళన ఉత్తర తెలంగాణకే తలమానికమైన వరంగల్ మహాత్మా గాంధీ మెమోరియల్ (ఎంజీఎం) ప్రభుత్వ ఆసుపత్రిలో వరుస ప్రమాదాలు రోగులను, వారి బంధువులను భయాందోళనకు గురిచేస్తున్నాయి. తాజాగా ఆసుపత్రిలోని ఆర్‌ఐసీయూ ,ఫిజియోథెరపీ విభాగాల్లో పైకప్పు పెచ్చులు ఊడిపడ్డాయి. ఘటన జరిగిన సమయంలో ఆ ప్రాంతంలో రోగులు గానీ, ఆసుపత్రి సిబ్బంది గానీ ఎవరూ లేకపోవడంతో పెను ప్రమాదం తప్పినట్లయింది.
ఇటీవలే ఆసుపత్రిలోని ఆరోగ్యశ్రీ వార్డులో ఇదే తరహాలో సీలింగ్ పెచ్చులు ఊడిపడటంతో పలువురు గాయపడిన విషయం విదితమే. ఆ ఘటన మరువకముందే మళ్లీ ఆర్‌ఐసీయూ, ఫిజియోథెరపీ వార్డుల్లో పెచ్చులు కూలిపోవడం గమనార్హం. వరుసగా జరుగుతున్న ఈ ఘటనలతో భవన భద్రతపై తీవ్ర అనుమానాలు వ్యక్తమవుతున్నాయి. నిత్యం వేలాది మంది పేద రోగులు చికిత్స కోసం వచ్చే ఈ ఆసుపత్రిలో ఏ నిమిషానికి ఏ ప్రమాదం జరుగుతుందోనని ఆందోళన చెందుతున్నారు. తక్షణ మరమ్మతులు చేపట్టాలి:
పాతబడిన భవన పైకప్పులను, వార్డులను అధికారులు వెంటనే సమగ్రంగా పరిశీలించి తగిన మరమ్మతులు చేపట్టాలని రోగుల బంధువులు, స్థానికులు విజ్ఞప్తి చేస్తున్నారు. భవిష్యత్తులో ఎలాంటి అవాంఛనీయ సంఘటనలు జరగకుండా ఉన్నతాధికారులు తక్షణమే స్పందించి భద్రతా చర్యలు తీసుకోవాలని డిమాండ్ చేస్తున్నారు.
