తెలంగాణ రాష్ట్ర ముఖ్యమంత్రి శ్రీ ఎనుముల రేవంత్ రెడ్డి గారి నేతృత్వంలోని కాంగ్రెస్ ప్రజా ప్రభుత్వం 1000 రోజులు విజయవంతంగా పూర్తి చేసుకున్న సందర్భంగా మంచిర్యాల నియోజకవర్గంలో సంబరాలు అంబరాన్నంటాయి. ఈ చారిత్రక ఘట్టాన్ని పురస్కరించుకుని మంచిర్యాల ఎమ్మెల్యే శ్రీ కొక్కిరాల ప్రేమ్ సాగర్ రావు, మాజీ డీసీసీ అధ్యక్షురాలు శ్రీమతి కొక్కిరాల సురేఖ గారి ఆధ్వర్యంలో సుమారు 1000 బైక్‌లతో భారీ ర్యాలీ నిర్వహించారు. ఎమ్మెల్యే నివాసం నుంచి ప్రారంభమైన ఈ ర్యాలీ.. బెల్లంపల్లి చౌరస్తా, వెంకటేశ్వర టాకీస్, ఐబీ చౌరస్తా మీదుగా సీసీసీ కార్నర్ చౌరస్తా వరకు ఉత్సాహభరితంగా సాగింది. ఈ సంబరాల సందర్భంగా ఏర్పాటు చేసిన సభలో ఎమ్మెల్యే ప్రేమ్ సాగర్ రావు నియోజకవర్గ అభివృద్ధిపై కీలక ప్రకటనలు చేశారు. దండేపల్లి, తాళ్లపేట నుండి అరుణక్క నగర్ వరకు ఉన్న 22ఏ (22A) భూముల సమస్యపై డాక్టర్ బి.ఆర్. అంబేద్కర్ సాక్షిగా ప్రమాణం చేస్తూ.. ఈ వర్గీకరణ వల్ల ఏ ఒక్కరి ఇల్లు లేదా స్థలం పోకుండా చూసే బాధ్యత తనదేనని, ఎవరైనా ఆస్తి కోల్పోతే తన ఎమ్మెల్యే పదవికి సైతం రాజీనామా చేస్తానని ప్రజలకు భరోసా ఇచ్చారు. పాత మార్కెట్ స్థలంలో హాస్పిటల్ నిర్మాణం శరవేగంగా జరుగుతోందని, రూ. 85 కోట్లతో నాలుగు లిఫ్ట్ ఇరిగేషన్ ప్రాజెక్టులకు టెండర్లు పూర్తయ్యాయని ఆయన తెలిపారు. అలాగే, ప్రభుత్వ పాఠశాలల్లో అత్యధిక అడ్మిషన్లతో మంచిర్యాల రాష్ట్రంలోనే ప్రథమ స్థానంలో నిలిచిందని ఆయన ప్రభుత్వ విజయాలను గర్వంగా వివరించారు.
ఈ భారీ బైక్ ర్యాలీలో స్థానిక నాయకులు, కాంగ్రెస్ శ్రేణులు పెద్ద ఎత్తున ఉత్సాహంగా పాల్గొన్నారు. మంచిర్యాల మున్సిపల్ మేయర్ ధర్ని మధుకర్, కార్పొరేషన్ కాంగ్రెస్ పార్టీ అధ్యక్షులు తూముల నరేష్, మంచిర్యాల మార్కెట్ కమిటీ చైర్మన్ రామగిరి బానేష్, వైస్ చైర్మన్ జాలే రాయలింగు, సింగిల్ విండో వైస్ చైర్మన్ శ్రీపతి మల్లేష్ ఈ వేడుకల్లో పాలుపంచుకున్నారు. వీరితో పాటు మాజీ మున్సిపల్ వైస్ చైర్మన్ సల్ల మహేష్, మాజీ బ్లాక్ కాంగ్రెస్ అధ్యక్షులు పూదరి తిరుపతి, పలువురు కార్పొరేటర్లు, డివిజన్ అధ్యక్షులు, పట్టణ కమిటీ సభ్యులు, మైనారిటీ నాయకులు, యువజన కాంగ్రెస్, ఎన్ఎస్‌యూఐ (NSUI) నాయకులు, కార్యకర్తలు, అభిమానులు భారీ సంఖ్యలో పాల్గొని కార్యక్రమాన్ని విజయవంతం చేశారు